నటి వరలక్ష్మి శరత్కుమార్ ఇప్పుడు కొత్త ప్రయాణం ప్రారంభించారు. ఇప్పటి వరకు నటిగా ఎన్నో సినిమాల్లో నటించి మంచి పేరు తెచ్చుకున్న ఆమె, ఇప్పుడు దర్శకురాలిగా మారారు. ఆమె దర్శకత్వంలో వచ్చిన మొదటి సినిమా ‘సరస్వతి’.
ఈ సినిమా ట్రైలర్ విడుదల కార్యక్రమంలో వరలక్ష్మి చాలా భావోద్వేగంగా మాట్లాడారు. తెలుగులో ‘క్రాక్’ సినిమాతో దర్శకుడు గోపీచంద్ మలినేని తనకు సెకండ్ లైఫ్ ఇచ్చారని తలచుకుంటూ ఆమె వేదికపై కన్నీళ్లు పెట్టుకున్నారు. అంతేకాదు, చిత్ర పరిశ్రమలో ఒక మహిళగా ముందుకు రావడం ఎంత కష్టమో, సినీ రంగంలో తాను పడిన కష్టాల గురించి వరలక్ష్మి వివరించారు.
నటి వరలక్ష్మి శరత్కుమార్ తెలుగు ప్రేక్షకులకు ప్రత్యేకంగా పరిచయం అవసరం లేని పేరు. తమిళంలోనే కాదు, తెలుగులోనూ మంచి గుర్తింపు తెచ్చుకున్నారు. కథానాయికగానే కాకుండా క్యారెక్టర్ ఆర్టిస్టుగా, విలన్గా వివిధ పాత్రల్లో అలరించారు. అయితే ఇప్పుడు వరలక్ష్మి కొత్త రంగంలోకి అడుగు పెట్టబోతున్నారు. ఇప్పటివరకు యాక్టర్గా కనిపించిన ఈమె, ఇప్పుడు డైరెక్టర్గా తెర వెనక కనిపించబోతున్నారు.
‘సరస్వతి’ సినిమాకు దర్శకత్వం వహించడంతో పాటు, ఈ చిత్రంలో ఒక ముఖ్యమైన పాత్రను కూడా వరలక్ష్మి పోషిస్తున్నారు. ఆమెతో పాటు ప్రకాష్ రాజ్, ప్రియమణి కీలక పాత్రల్లో నటిస్తున్నారు. వరలక్ష్మి తన సోదరి పూజా శరత్కుమార్తో కలిసి ఈ సినిమాను నిర్మిస్తున్నారు. సంగీత దర్శకుడిగా తమన్ ఈ సినిమాకు సంగీతం అందిస్తున్నారు.
ఈ సినిమాను మార్చి 6వ తేదీన థియేటర్లలో విడుదల చేయడానికి ఏర్పాట్లు చేస్తున్నారు. ఇప్పటికే సినిమా ప్రచార కార్యక్రమాలు వేగంగా సాగుతున్నాయి. తాజాగా విడుదలైన ట్రైలర్ ప్రేక్షకుల దృష్టిని ఆకర్షించింది. ఈ ట్రైలర్ను హీరో నాని విడుదల చేసి, సినిమా టీమ్కు శుభాకాంక్షలు తెలిపారు.
శనివారం జరిగిన ట్రైలర్ లాంచ్ కార్యక్రమానికి డైరెక్టర్ గోపీచంద్ మలినేని, నిర్మాత బన్నీ వాసు ముఖ్య అతిథులుగా హాజరయ్యారు. ఈ సందర్భంగా వరలక్ష్మి, గోపీచంద్ గురించి మాట్లాడుతూ భావోద్వేగానికి లోనయ్యారు.