ఆంధ్రప్రదేశ్ ప్రభుత్వం మరో కీలక నిర్ణయం తీసుకుంది. కూటమి ప్రభుత్వం అధికారంలోకి వచ్చిన తరువాత ఇచ్చిన హామీ ప్రకారం ప్రతీ నెలా ఒకటో తేదీనే రూ. 4,000 పెన్షన్ను లబ్ధిదారులకు అందిస్తోంది. గ్రామ, వార్డు సచివాలయ సిబ్బంది ద్వారా నేరుగా ఇంటి వద్దకే వెళ్లి పంపిణీ చేసే విధానాన్ని ప్రభుత్వం కట్టుదిట్టంగా అమలు చేస్తోంది. దీంతో వృద్ధులు, వికలాంగులు, విధవలు వంటి లబ్ధిదారులు బ్యాంకులకు వెళ్లాల్సిన అవసరం లేకుండా సౌకర్యవంతంగా పెన్షన్ పొందుతున్నారు.
అయితే కొత్త పెన్షన్ల మంజూరు పైనా ప్రభుత్వం కసరత్తు చేస్తోంది. అర్హులైన ప్రతి ఒక్కరికి సామాజిక భద్రతా పథకాల ప్రయోజనం అందేలా అధికారులకు ప్రత్యేక ఆదేశాలు జారీ చేసింది. ఈ నెల పెన్షన్ల పంపిణీ వేళ ప్రభుత్వం కీలక మార్పు చేసింది. ఈ మేరకు సచివాలయాలకు స్పష్టమైన మార్గదర్శకాలు అందించింది.
మార్చి 1న జరగాల్సిన పెన్షన్ పంపిణీపై ప్రభుత్వం ప్రత్యేక నిర్ణయం తీసుకుంది. కొత్త సంవత్సరం ప్రారంభం సందర్భంగా లబ్ధిదారులకు ఒక రోజు ముందుగానే నగదు అందించాలని నిర్ణయించింది. ఈ మేరకు అధికారిక ఆదేశాలు జారీ చేసింది. మార్చి 1, 2026 బదులుగా ఫిబ్రవరి 28నే పింఛన్లు అందనున్నాయి.
అన్ని గ్రామ/వార్డు సచివాలయాల సిబ్బందికి ఫిబ్రవరి 27 నాటికే అవసరమైన నగదు అందజేయాలని, పంపిణీకి సంబంధించిన అన్ని ఏర్పాట్లు పూర్తి చేసుకోవాలని ముందస్తు సూచనలు ఇచ్చింది. ఫిబ్రవరి 28నే రాష్ట్రవ్యాప్తంగా పింఛన్ల పంపిణీ పూర్తి చేయాలని ప్రభుత్వం లక్ష్యంగా పెట్టుకుంది.
ఒకవేళ ఏవైనా కారణాల వల్ల కొన్ని పింఛన్లు మిగిలిపోతే, ఆయా లబ్ధిదారులకు మార్చి 2న పంపిణీ చేయాలని అధికారులు ఆదేశాలు జారీ చేశారు. పంపిణీ ప్రక్రియలో పారదర్శకత, సమర్థత పాటించాలని కూడా స్పష్టం చేశారు.
రాష్ట్ర వ్యాప్తంగా 63.12 లక్షల పింఛన్దారులకు ప్రతీ నెలా ఒకటో తేదీనే రూ. 2743.99 కోట్లు సచివాలయ సిబ్బంది లబ్ధిదారుల ఇంటివద్దనే పంపిణీ చేస్తున్నారు. ఒకటో తేదీ సెలవు వస్తే ముందురోజునే పంపిణీ ప్రక్రియ పూర్తి చేసే విధానాన్ని ప్రభుత్వం అమలు చేస్తోంది.
ఈసారి మార్చి 1న ఆదివారం కావడంతో ప్రభుత్వం తాజా ఆదేశాల మేరకు ఫిబ్రవరి 28న పెన్షన్లు పంపిణీ చేసేందుకు రంగం సిద్ధం చేసింది. దీంతో లబ్ధిదారులకు ముందుగానే ఆర్థిక సహాయం అందనున్నది.