2026 ఫిఫా ప్రపంచకప్లో అర్జెంటీనా (Argentina), స్విట్జర్లాండ్ (Switzerland) మధ్య జరిగిన మ్యాచ్ మైదానంలో తీవ్ర ఉద్రిక్తతకు దారితీసింది. అదనపు సమయంలో అర్జెంటీనా విజయం సాధించినప్పటికీ, మెస్సీ ప్రదర్శించిన ఆగ్రహం ఈ మ్యాచ్కు ప్రధాన ఆకర్షణగా నిలిచింది. ముఖ్యంగా అర్జెంటీనా కెప్టెన్ లియోనెల్ మెస్సీ (Lionel Messi), మ్యాచ్ రిఫరీ జోవావో పిన్హీరో (João Pinheiro) మధ్య జరిగిన వాగ్వాదం అభిమానుల దృష్టిని ఆకర్షించింది.
మ్యాచ్ తొలి అర్ధభాగంలో స్విట్జర్లాండ్కు ఫ్రీ కిక్ లభించిన సమయంలో ఈ ఘటన చోటుచేసుకుంది. అర్జెంటీనా ఏర్పాటు చేసిన డిఫెన్సివ్ వాల్లో ఉన్న మెస్సీని నిబంధనల ప్రకారం కొంత దూరం వెనక్కి వెళ్లాలని రిఫరీ పిన్హీరో సూచించారు.
అయితే రిఫరీ మాట్లాడిన తీరుపై మెస్సీ తీవ్ర అసహనం వ్యక్తం చేశాడు. వెంటనే స్పందిస్తూ, “నాతో మర్యాదగా మాట్లాడు. నన్ను అగౌరవపరచకు. నేను నీతో సరిగ్గానే మాట్లాడాను” అంటూ రిఫరీకి గట్టిగా బదులిచ్చాడు. కొద్దిసేపు ఇద్దరి మధ్య మాటల యుద్ధం కొనసాగింది.
మ్యాచ్ ప్రారంభం నుంచే స్విస్ జట్టు పటిష్ఠమైన డిఫెన్స్తో మెస్సీని సమర్థంగా అడ్డుకుంది. నిర్ణీత 90 నిమిషాల ఆట ముగిసే సమయానికి స్కోరు 1-1తో సమంగా ఉండటంతో మ్యాచ్ మరింత ఉత్కంఠభరితంగా మారింది.
ఈ సమయంలో రిఫరీ జోవావో పిన్హీరో తీసుకున్న మరో నిర్ణయం కూడా వివాదాస్పదమైంది. వీఏఆర్ (VAR) సమీక్ష అనంతరం డైవింగ్ చేసినందుకు స్విట్జర్లాండ్ ఆటగాడు బ్రీల్ ఎంభోలోకు రెడ్ కార్డ్ చూపించి మైదానం నుంచి పంపించారు. దీంతో స్విస్ జట్టు 10 మందితోనే ఆటను కొనసాగించాల్సి వచ్చింది.
ఈ అవకాశాన్ని సద్వినియోగం చేసుకున్న అర్జెంటీనా అదనపు సమయంలో వరుసగా రెండు గోల్స్ చేసి విజయాన్ని సొంతం చేసుకుంది. అదనపు సమయంలో జట్టు చూపించిన దూకుడు అభిమానులను అలరించింది.
యూరప్లోని అత్యంత ప్రతిభావంతులైన రిఫరీలలో ఒకరిగా గుర్తింపు పొందిన 38 ఏళ్ల జోవావో పిన్హీరోతో మెస్సీకి జరిగిన వాగ్వాదం ప్రస్తుతం ఫుట్బాల్ ప్రపంచంలో చర్చనీయాంశంగా మారింది. ఈ ఘటనకు సంబంధించిన వీడియోలు సోషల్ మీడియాలో వైరల్ అవుతున్నాయి.